梅利號 by 悦與歌

出道兩年嘅吳林峰尋日正式推出個人第一張EP《Life Donut》，收錄咗六首佢出道以來六首派台歌，包括《你是萊特》、《下一束光》、《街燈》、《巴士光年》、《一切安好…?》同今日想講嘅呢首《梅利號》。

如果有聽開佢唱歌嘅話，相信都知吳林峰最吸引人嘅係佢把非常沉穩、厚實嘅聲線，唱出好似《下一束光》、《越壞越強》同《一切安好…?》呢類型歌曲嘅時候真係好容易散發出一種陪伴嘅力量。呢幾首歌能夠陪伴我渡過好多次失望、無助嘅時間，除咗因為旋律令人舒服、歌詞貼地有共鳴之外，更加因為有吳林峰發自真心嘅演繹，每次聽嘅時候好似有個人陪伴在旁咁，一齊撐過好壞嘅時刻。

但除咗呢類好沉重嘅歌之外，吳林峰亦都有唱一啲輕快而且勵志嘅打氣歌，當中我其實好鍾意呢首《梅利號》。呢首算係佢出道以來比較少人認識或者提及嘅歌，但對於生活喺呢個充滿挑戰嘅社會嘅香港人嚟講，每一日生活好似航海咁，不時遇上風高浪急嘅挑戰。當撐過最壞時刻之後，就一齊同身邊同伴發揮ONE PIECE精神，勇往直前，向終點進發。

BTW，新碟我今日去拎啦，無預訂又想買嘅之後留意下市面有無得買啦。

《梅利號》曲、主唱：吳林峰詞：T-Rexx 編：Teddy Fan 監：Perry Lau Official Lyrics Video: https://youtu.be/4bRZFoL3_eA