本日終了+和你一樣孤獨 by 悦與歌

以「再出道」為主題嘅《全民造星III》有唔少參賽者本身已經係出咗道但知名度未夠高嘅歌手，希望透過參加呢個節目令更多人認識。節目過後率先有十強之一葉巧琳（Mischa）推出曾經係總決賽表演過嘅新歌《浸浴》，最近就有亞軍陳葦璇同五十強選手蘇家欣（Bee）推出新歌。

先講陳葦璇，新歌《本日終了》搵來JNY一齊作曲填詞，JNY亦負責編曲同監製。其實呢首歌本身曲詞唔錯，旋律唔算主流易記，但個節奏配合到陳葦璇本身型格嘅形象，歌詞幾有意思，連繫過去嘅失敗經歷、瘡疤同碎片帶出要堅強、破舊立新嘅生存模式。JNY編曲用好多聲效去襯托，初段感覺還好，但中後段越來越大聲蓋過哂葦璇把聲，尾段差啲聽唔到人聲唱緊，唔知係唔係JNY特登要做咁嘅效果，但同唔少人一樣我就覺得有啲喧賓奪主，反而令我哋對葦璇把聲失去記憶。

至於呀Bee，新歌《和你一樣孤獨》就係另一個極端，編曲好清好acoustic，完全係突顯佢把聲。呢首歌亦係尚品娛樂近一兩年好喜歡用嘅班底創作，Tomy Ho、Logout Fan、麥鏇璧負責曲編監，填詞就搵來Oscar。其實Bee把聲同唱歌一啲都唔差，雖然唱live可能會緊張唔穩定，但呢首歌同上年《一人行》都係一把令人舒服嘅聲音，用嘅感情同力度都好配合歌詞。呢首歌曲詞其實我都幾中意，好聽入腦嘅旋律、加埋我好投入到講有關「孤獨」嘅歌詞。佢嘅「問題」只係點樣令人記得佢把聲，暫時兩首歌都未令人對佢留有印象，簡單講係「認到歌但認唔到人」，呢樣嘢要睇佢同公司點樣透過音樂塑造到屬於佢嘅形象啦。

《本日終了》

曲：JNYBeatz / 陳葦璇

詞：陳葦璇 / JNYBeatz

編、監：JNYBeatz

主唱：陳葦璇

YouTube: https://youtu.be/lSgAOnh_9wQ