一進不退 by 悦與歌

聽完即刻好想玩「跑Online」。

尋晚介紹Canband，有提過聽佢哋令我聯想起ToNick，今日就講下ToNick，佢哋最近都出咗新歌《一進不退》。

呢兩年聽ToNick好容易搵到共鳴，因為佢哋永遠唱到我嘅心聲，好似上年《衰喺個掣度》、《鬼滅之日》都係好切身處地咁形容緊我哋對呢個社會嘅心聲，到年底《一口氣》淡然但溫暖咁唱出一份作為香港人呢一兩年嘅感受，然後同周國賢合唱《時間的初衷》激發大家心底一份熱血（仲等緊戲院復業睇《一秒拳王》呀！），正正係透過音樂回應緊呢個時代。

來到2021，《一進不退》繼續勉勵大家無論前路有幾難行、幾多障礙都好，大家都要好似玩「跑Online」咁，朝相信嘅方向繼續向前走。或者有好多未知數，但為咗同伴、為咗信念同價值，我哋無後退嘅空間，只能繼續向前走，相信呢一口氣可以換來鬼滅之日嘅來臨。

BTW，想download跑Online就入去個MV，有埋條link架。

《一進不退》曲、編、主唱：ToNick 詞：蕭慶峰監：Adrian Chan / ToNick Official MV: https://youtu.be/pPH916AWXYM