REPLY致明日的舞 by 悦與歌

每人對未來都有自己的解讀。

C AllStar所屬嘅唱片公司私人國（Kingdom C）今年展開一個叫「Young Blood」嘅新音樂企劃，希望搵新一代嘅音樂人做啲屬於年輕人嘅音樂。呢個企劃以20歲Rapper NOVEL FRIDAY（NF）新歌《REPLY致明日的舞》打頭陣。

本身呢首歌同Project都未吸引到好多人關注，直到香港01刊登NF專訪，佢坦言呢首歌係要用音樂回應陳奕迅上年嘅作品《致明日的舞》，但獲唔少陳奕迅歌迷unfollow，並指呢班人未了解就已經有呢個行為覺得好無奈。呢篇訪問刊登之後，樂迷同網上樂評之間就多咗迴響。

首先，我自己覺得每個人對未來係點樣都有自己嘅解讀。林家謙、Oscar、陳奕迅一齊製作嘅《致明日的舞》係一種好大路嘅勵志歌，用同伴嘅角度勸勉大家對明日或者未來仍然要充滿盼望。Eason並唔係企喺長輩嘅高位教訓大家要點樣看好未來，而係希望透過音樂為大家療傷，相信唔少人聽完《致明日的舞》都有類似嘅感覺。

當然，有人會覺得呢兩年社會壓迫咁強，而且可能各自有好多不快嘅經歷，覺得《致明日的舞》呢種正能量好離地。我某程度上都認同，因為要喺呢個咁令人窒息嘅環境對未來充滿期盼實在係唔現實，所以NF呢首《REPLY致明日的舞》就係話比大家聽，佢唔認同呢種離地感覺，覺得計劃未來係一個奢侈事情，反而強調珍惜今天，I’m just dancing for today。

講完兩邊，我一直糾結緊嘅係，其實兩樣嘢係唔係有需要放到對立面？以我自己為例，雖然我平常覺得正能量好離地，但唔能夠否認嘅係我好多時候都需要療傷系歌曲嘅力量令自己走落去。我哋係唔係應該放棄呢個二元對立嘅想法呢？歡迎大家留低你嘅諗法。

《REPLY致明日的舞》作曲：NOVEL FRIDAY 作詞：NOVEL FRIDAY 編曲：J1M3 / MAEL 監製：Bert744 / KENI 主唱：NOVEL FRIDAY KKBOX Audio: https://kkbox.fm/fSke38